Parola di Diu

 

 

         ‘Na picciutedda di boni spiranzi,

chi non aveva mai nenti chi fari

e sempri ‘n chiesa ci piaceva annari,

un jornu si fici ‘na caminata supra e’ branzi.

 

         Camina camina, arruvò ‘ntà ‘nu ortu

e visti a so’ ziu chi zappava;

senza pinseri ‘ddu mischinu trovagghiava,

ma jera avvilutu e stancu mortu.

 

-         Zù Caloriu, ossà binidica…..

m’ ‘u pozzu cogghiri un mazzittu di ciuri?

Ci ‘u portu in chiesa a nostru Signuri!

Poi nni manciamu ‘ssi du’ fica.

 

-         No signura! – rispusi chiddu senza ‘mbrogghi.

- Si’ Diu è ‘ncelu, in terra e in ogni locu,

carissima niputi, sa’ iò chi ti dicu,

mi passa di cà ‘ntà l’ortu e mi si cogghi.

 

         ‘Ntò Vangelu così è scrittu,

chista è parola di Diu

e lu sapi puru lu ziu,

com’è veru chi fu dittu!

 

 

S. Salvatore, Agosto 1998.