|
L'acqua
surienti scinni da muntagna
cantannu fra li rocchi a primavera;
s'allarga ammenzu ò pratu e non trascura
l'irbuzza e li sciuriddi di vasàri.
Rosi e
jinestri bbagna la surgìva,
e primuli, violi e ciclamini;
cci sguazzunu jucannu l'acidduzzi,
li 'certuli cci bbivunu li serpi.
E lu caluri,
ora, di giugnettu,
lu vadduneddu scinni versu u chianu;
assitata pustia 'a paparina,
mmucciata ntra li spighi di lu granu.
E l'acqua,
pruvvidenza da natura,
cuntrasta di l'estate la calura,
di quannu leta canta la cicala
e carcaria 'a bbuffa nto pantanu.
Agghicunu a
sittembri l'acquarìi
facennu lu vadduni straripari;
di zuccaru diventa la racina
e l'ogghiu duna prestu l'alivara.
Non vidu cchiù
violi o ciclamini
ma sulamenti tristi crisantemi;
mi mancunu l'aciddi 'i primavera,
lu cantu di l'ariddi e da cicala.
E crisci,
sempre crici lu vadduni,
s'ingrossa furiusu, si fa ciumi;
ciumi di peni granni e di duluri
chi non si ferma cchiù finu a lu mari.
E, quannu
l'acqua amara mi trascina
e pari chi lu cori cchiù non teni,
li ciarameddi sentu di Natali
e mi ritrovu ancora a navicari.
|
